PERROZ , qui son engin ess ' art
mist en vers faire de Renart
et d ' Isengrin son chier conpere ,
laissa le mieuz de sa matiere
quant il entroblia les plaiz
et le jugement qui fu faiz ,
en la cort Noble le lion ,
de la grant fornicacion
que Renart fist , qui toz max cove ,
envers dame Hersent la love .
Ce dist l ' estoire es premiers vers
que ja estoit passez yvers
et l ' aube espine florisoit
et la rose espannisoit
et pres fu de l ' Acension ,
messires Noble le lyon
toutes les baisstes fist venir
en son palais por cort tenir .
Onques n ' i ot beste si ose
qui se tardast por nule chose ,
fors que Renart tant solement ,
le mal laron , le sodoiant ,
que tuit li autre vont huiant ;
et si le vont mout despisant
et encusant devant le roi
par son engin , par son desroi .
Et Isangrin , qui pas ne l ' aime ,
devant touz les autres se claime
et dist au roi: " Biax tres douz sire ,
faites me droit de l ' avoutire
que Renart fist a m ' espousee ,
dame Hersant , qu ' ot enserree
a Maupertuis , son fort repere ,
qant il a force li vost faire .
A force li fist il li rous !
dolenz en sui et coroçous ;
et conpissa toz mes loviaus :
icist gieux ne fu mie biaus .
Renart prist jor de l ' escondire
qu ' il n ' avoist pas fait l ' avoutire :
qant li saint furent aporté ,
ne sai qui li ot enhorté ,
et il se traist mout tost ariere ,
si se feri en sa taisniere .
- Isangrin , laissiez ce ester :
vos n ' i porriez riens conquester
a ramentevoir vostre honte .
Musart et li roi et li conte
deviennent cop , hui est li jorz ,
et cil qui tienent les granz corz .
Onques de si petit domaige
ne fu tiex diaux ne si grant rage . " ,
Dist Bruns li ors : " Biau tres douz sire ,

vos porrïez assez miauz dire ,
que il a fait tantes molestes
et conchïees tantes betes .
Est Isangrin ne morz ne pris ,
se Renart a vers lui mespris ,
que bien n ' en soit prise vanjance ?
Isangrin a bien tel puissance ,
se Renart pres de lui mannoit
et por la pes ne remannoit
qui novelement est juree ,
ja envers lui n ' avroit duree .
Mais vos estes prince de terre ,
si metez pais en ceste guerre ;
metez pais entre voz barons :
cui vos harez , nos le harrons
et manderons de vostre part .
S ' Isengrins se plaint de Renart ,
faites le jugement seoir ;
c ' est le mieuz que puisse veoir :
se l ' uns tout l ' autre , si li rande
et dou meffet li ploit l ' amande .
Mandez Renart a Malpertuis :
je l ' amenré , se je le truis
et vos m ' i volez envoier ;
je l ' aprandrai a cortoier .
- Sire Bruns , dit Bruianz li tors ,
maudahez ait , sanz vostre cors ,
qui ja conseillera le roi
qu ' il praingne amande dou desroi ,
de la honte , de l ' avoutere ,
que Renart fist a sa conmere ,
ne mes ne l ' en doit l ' en aidier .
Conment doit Isangrin plaidier
de chose qui si est aperte
et conneüe et descoverte ?
Et je sai bien , que que nus die ,
que cil qui tot le mont conchie ,
Renart , icil mavés lechierres ,
cil rous puanz , cil orz trichierres ,
eüst ma fame si baillie
contre son cuer l ' eüst saisie ,
ja Maupertuis nel garantist ,
ne forteresce qu ' il feïst
que je ne l ' eüse tué
et puis en un conpaing rué .
Hersant , dont vos vint cist coraiges ?
Certes , ce fu mout grant damajes
c ' onques Renart , cil fel , cil rous ,
vos bati onques le velous .
- Sire Bruianz , dist li taissons ,
le mal , se ne l ' abaissions ,
porra encor a pis torner ;
qar tel puet le mal enhorter
et espandre et bien semer ,
qu ' il nou porroit pas amander .
Se Renart le fist par amor ,
quel plait i a et quel clamor ?
Pieça que il l ' avoit amee :
ja ceste ne s ' en fust clamee ,
se fait l ' eüst ; mes par mon chief
Isangrin l ' a pris trop en grief .
Devant le roi et le barnaige
sera amendez cist outraige :
se li vaissiax est enpiriez
et par Renart mal atiriez
le vaillant d ' une noiz de coudre ,
prez sui que je li face soudre ,
lors qant Renart sera venuz
et li jugemenz iert tenuz ;
mes naiainz est , si con je pans ,
que blamee est dame Hersans .
Hai ! quele honor de tel plait ?
Vostre mariz vos a ce fait
a maintes bestes regarder .
Certes , l ' en vos devroit tuer ,
c ' il vos apele bele suer ,
se ja mes li portez bon cuer :
il ne vos aime ne resoigne . "
Hersant rogist , s ' en ot vergoigne ,
trestoz li paus l ' en va levant ;
si respondi en soupirant :
" Sire Grinbert , je n ' en puis mais :
j ' amasse mieulz assez la pais
entre mon seignor et Renart .
Certes , onques n ' ot en moi part
en tel maniere n ' en tel guise ;
j ' en feroie bien un jouïse
en eve chaude ou en feu chaut ,
mais esconduire riens ne vaut ,
lasse , chaistive , mal ostrue !
que je n ' en serai ja creüe .
Mes , par les sainz que l ' en aeure
ne se Damedieu me sequeure ,
onques Renart de moi ne fist
que de sa mere ne feïst .
Por dant Renart nou di ge mie
ne por amander sa partie :
autretant m ' est que l ' en li face ,
qui que l ' aint ne qui que le hace ,
con il m ' est d ' un charbon arsin ;
mais je le di por Isangrin
qui de moi est ausi jalous
que toz jorz en cuide estre cous .
Foi que je doi Piqart son fil ,
aen le premier jor d ' avril
ot .x . anz qu ' Isengrin me prist ,
que Paques fu , si con il dist .
Mes noces furent si plenieres
que noz foces et noz doieres
furent toutes de bestes plaine ,
certes voire , que a grant paine
poïssent tant de vuit trover
ou une oue poïst couver .
Iluesques devin ge s ' espouse :
ne me tenoit pas a genglouse
n ' a soignant ne a beste fole .
Or revendrai a ma parole :
onques puis , se Dex me doint joie ,
qui m ' en viaut croire , si m ' en croie ,
ne fis de mon cors lecherie ,
ne malvaistié , ne puterie ,
ne mesfait , ne vilain afaire
c ' une none ne peüst faire . "
Qant Hersant se fu esconduite
et ele ot bien sa raison dite ,
Bernarz li anes , qui l ' oï ,
dedanz son cuer s ' en esjoï
que lors cuida tout a estrous
qu ' Isengrin ne fust mie cous .
" Aï ! fait il , gentil barnesse ,
car fust or si loial m ' anesse
et chien et leu et toutes bestes ,
dame Hersant , conme vos estes .
Qant vos en avez tant juré ,
tout m ' en avez aseüré :
ja mes ne vos en mesquerré ;
tel sairement vos en ferai
que , se Diex me face pardon
ne il me laist trover chardon
qui soit tanres a ma pasture ,
que vos onques n ' eüstes ; cure
de Renart ne de son deduit
ne de s ' amor , si con je cuit .
Mais li siecles est si mauvais ,
si mesdisanz et si pugnais ,
qu ' il blame ce que loer doit
et tesmoigne ce qu ' il ne voit .
Aï ! Renart , fox , mal senez ,
con de male eure tu fus nez
et engendrez et conceüz ,
que tu ne seras ja creüz !
Ja estoit la novele issue
que Hersent avïez foutue
et ele en viaut faire un joïse
onques ne fu par vos requise ;
Renart l ' oï , mais ne dist rien ,
de respondre se garda bien ,
ainçois se taist , si ne dist plus .
Vos savez bien tuit corre sus :
celui qui ne se puet rescorre ,
tuit li autre li corent seure . "
Grimbert li taissons se leva ;
se il puet , Renart aidera ,
que ses cousins germains estoit .
Devant le roi venuz est droit ,
son chapel oste , si s ' escout :
" Seignor , fait il , taissiez vos tout .
Ha ! gentix rois , frans debonaire ,
car metez pais en cest afaire ,
si aiez de Renart merci .
Laissiez le moi amener ci
et ça venir a sauveté .
De ce qu ' Isangrins l ' a resté
tele amandise l ' en fera
com vostre cort esgardera ;
et se il l ' a fait par despit ,
le targement et le respit
qu ' il a fait de venir a cort
amandera ainz qu ' il s ' en tort .
- Sire , ce respont li conciles ,
onques ne vos aït sainz Giles ,
se vos plaist et le conmandez ,
se ja Renart i est mandez
hui ne demain ; se il vos siet ,
aprés demain , si ne vos griet ,
le faites a force amener
et puis tel livroison livrer
si qu ' a une foiz s ' en chastit .
Maintes foiz a pris tel despit :
que une autre foiz s ' en recort ! "
Respont Nobles : " Vos avez tort ,
qui Renart volez forsjugier .
Tout ce poons nos bien laissier ,
que , se nus de vos maine orgeil ,
ce meïmes li pant a l ' oil .
Renart ne hé ge mie tant ,
por ce que tuit le vont nuisant ,
que je le voille ore honir ,
se il vers moi viaut obeïr .
Isangrin , prenez cel joïse
que vostre fame vos devise ,
se vos laisier ne l ' en volez .
- Je l ' en prandrai , se vos volez !
Se Hersant portoit le juïse
ou ele estoit arse ou esprise ,
lors le savroit qui or nel set ,
liez en seroit qui or vos het ;
lors diroient tout a estrous :
" Veez le coup , vez le jalous ! "
Miauz me vient il , selonc ce plait ,
soufrir la honte qu ' il m ' a fait
tant que je m ' en puisse vangier ;
mais , ainz c ' om doie vandangier ,
cui ge Renart mener tel guerre
ne le guerra ne ciel ne terre
ne murs ne fossez desfansables .
- Or dont , dit Noble , au deauble !
Or me dites , sire Isangrin ,
prandra ja vostre guerre fin ?
Cuidez i vos riens gaaignier
en Renart ansi menacier ?
Foi que je doi saint Lïenart ,
je connois tant les faiz Renart ,
einçois vos puet il faire anui ,
honte et vergoigne , que vos lui .
D ' autre part la pais est juree
et la terre aseüree :
qui la fraindra , s ' il est tenuz ,
mout malement sera venuz . "
Quant Isangrin oï le roi
qui de la pais prenoit conroi ,
touz fu honteus , ne sot que faire ,
ne il n ' en set a quel chief traire .
A la terre entre .II . eschames
s ' asist sa qeue entre ses james .
Or estoit bien Renart cheü ,
se Diex li eüst porveü .
En tel point 1 ' avoit pris li rois ,
la pes fust maugré les irois
et la guerre preïst ja fin
entre Renart et Isangrin ,
se ne fust Chantecler et Pinte ,
qui avenoit a cort soi quinte ,
devant le roi de Renart plaindre .
Or est li feus griés a estaindre ,
que sire Chanteclers li cos
et Pinte qui pont les oes gros
et Rouse et Noire et la Blanchete ,
atraïnent une charroite
ennoree d ' une cortine:
dedanz gisoit une geline
qu ' eles amainant en litiere
tout autresi con une biere .
Renart 1 ' avoit si malmenee
et aus danz si desfiguree
qu ' i li avoit la cuise traite
et la detre ele dou cors traite .
Qant li rois ot mengié assez ,
et de plaidier estoit lassez ,
ez vos les gelines a tant
et Chantecler paumes batant .
Pinte s ' escrie premeraine
et les autres a longe alaine :
" Por Dieu , fait ele , gentix bestes
et chien et leu , si con vos estes ,
qar conseilliez ceste chaitive .
Je hé l ' ore que je sui vive .
.V . freres oi de par mon pere ,
toz les menja Renart li lere :
ce fu grant perte et grant dolors ;
de par me mere .v . serors ,
jones puceles et meschines ,
mout i avoit beles gelines ;
Girarz dou Fraite les paissoit ,
qui por pondre les angroissoit ;
li las mar les i angraissa :
onques Renart ne l ' en laissa
de totes .v . vivre une seule ,
toutes passerent par sa geule .
Et vos , qui la gisiez an biere ,
ma douce suer , m ' amie chiere ,
com vos estïez tandre et grase !
Que fera vostre suer la lasse ,
qui a grant dolor vos regarde ?
Renart , la male flame t ' arde !
tantes foiz nos avras folees
et chaciees et tribolees
et descirees noz pelices
et enbatues en noz lices .
Ier a none pres de la porte
nous gietas tu no seror morte ,
si t ' en foïs par mi un val ;
Girarz n ' ot mie isnel cheval ,
que il ne te pot mie ataindre .
Venue me sui de toi plaindre
et je ne truis qui droit m ' en face ,
que tu ne criens autrui menace ,
n ' autrui corroz , n ' autrui paroles . "
Pinte la lasse a cez paroles
cheï pasmee ou pavement
et les autres tout ensement .
Por secorre les .IIII . dames
se leverent de lor eschames
et chien et leu et autres bestes ;
l ' eve lor versent sor les testes .
Quant revinrent de paumoison ,
si con nos en l ' escrit trovom ,
la ou le roi virent seoir
toutes li vont as piez cheoir
et Chantecler s ' aagenoile ,
de ses lermes les piez li moille .
Qant li lions vit Chantecler ,
pitiez li prist dou bacheler :
un soupir a fait de parfont ,
ne s ' en tenist por tout le mont ;
de mautalant dresce la teste ;
puis n ' i ot si hardie beste ,
ors ne sangler , qui poor n ' ait
qant lor sire fremie et brait .
Tel paor ot Coarz li lievres
.IIII . jorz l ' en pristrent les fievres .
Toute la cort fremist ensanble ;
li plus hardiz de paor tranble ;
onques n ' orent coroz greignor ,
qant braire oïrent lor saignor .
Par mautalant la teste dresce ;
si se debat par tel destresce
que toute en sone la meison .
Puis fu itele la raison :
" Dame Pinte , dist l ' enperere ,
foi que je doi l ' ame mon pere
dont je ne fis aumone hui ,
mout me poise de vostre anui ,
mais je nou puis ore amander .
Je ferai ja Renart mander
qant cist cors sera anterrez ,
si que vos a voz iaux verrez
com grant vangance en sera prisse :
j ' en ferai faire un grant jouïse
de la meschine et del desroi ."
Qant Isangrin oï le roi ,
ilnelement en piez se dresce :
" Sire , fait il , c ' est grant proece
se vos Pinte vengier pouez ,
mout grant honeur i averez ,
et sa seror dame Coupee
que Renart a si devoree .
Si nel di je pas par haïne :
ainçois le di por la geline
qu ' il a morte que je ne face
por chose que je Renart hace . "
Dist l ' anperiere : " Biaus amis ,
cist granz diaux ou Renart m ' a mis
n ' est mie voir le premeraim .
A vos et as autres me claim
et plain , si con je faire voil ,
de l ' avotire et de l ' orgoil ,
de la traïson qu ' il a faite
et de la pais qu ' il a anfraite .
Mais or laisons ceste parole .
Sire Bruns , prenez ceste estole ,
et vos , sire Bruianz li tors ,
reconmandez l ' ame dou cors .
La jus an mi cele costure
me faistes une sepouture
entre ce plain et ce jardin ;
si parlerons d ' autre Martin .
- Sire , fait Bruns , vostre merci . "
A tant vont l ' estole saisir ,
lui et un autre soulement ,
et li rois son conmendement
et tuit li autre dou concile
ont conmenciee l ' evangile .
Sire Tardis li limeçons
lut par lui seul les .III . lecons
et Roonniaus chanta les vers
et le trait Brichemers li cers
et Bruns li or dist l ' oroison
que Diex gart l ' ame de prison .
Qant l ' evangile fu finee
et ce vint a la matinee ,
le cors porterent enterrer ;
mais ainçois l ' ont fait seeler
en un vaissel riche de plon ,
einz plus riches ne vit nus hon ;
si l ' enfoïrent soz un aubre .
Par deseure mistrent un maubre ,
si ont escrit le non la dame
et la vie desor la lame
neelé a sel et a grafe ;
puis ont escrit en l ' espetafe :
" Desoz cel abre , an mi ce plain ,
gist Coupee , la suer Pintain .
Renart , qui chascun jor enpire ,
en fist as danz tel decepline . "
Qui donc veïst Pintain plorer ,
Renart maudire et devorer ,
et Chantecler ses piez estandre ,
mout grant pitiez l ' en poïst prandre .
Qant le cors ont bien enterré
et grant dolor ont demené :
" Enperiere , font li baron ,
car nos vangiez de cest larron
qui tantes guiches nos a faistes
et tantes pais nos a anfraites .
- Volentiers , ce dist l ' enperiere ;
car i alez Brun , biax douz frere :
vos n ' averez de lui regart .
Mandez Renart de moie part
atandu l ' ai .III . jorz antiers .
- Sire , dist Bruns , mout volantiers . "
A tant s ' an torne l ' enbleüre
par mi le val d ' une couture ;
Bruns ne cesse ne ne repose .
Lors avint a cort une chose
qui enpira Renart son plait ;
que Coupee granz vertuz fait ,
que messires Couarz li lievres ,
qui de paor tranbla les fievres ,
.III . jorz les avoit ja eües ,
si les avoit iloc perdues
sus la tonbe dame Coupee ;
que , quant ele fu enterree ,
onques ne s ' en vout departir ,
si ot dormi sus le martir .
Si a Isangrin oï dire
que ele estoit vraie martire ;
dist qu ' il avoit mal en 1 ' oroille ,
et Roomniax bien le conseille:
483a . sor la tombe dormir le fist ;
483b . lors fu garis , si conme il dist ,
483c . mais , ce ne fust bone creance
dont nus ne doit avoir dotance
et Roomniax qui le tesmoigne ,
la cort cuidast ce fust mançonge .
Qant a la cort vint la novele ,
a tex i ot ne fu pas bele ;
mais a Grinbert fu ele laide ,
qui por Renart a la cort plaide
entre lui et Tibert le chat .
S ' or ne set Renart de barat ,
mal est bailliz , s ' il fust tenuz ;
que Bruns li ors est ja venuz
a Maupertuis , a son repaire ,
tres par mi 1 ' adresce d ' une aire .
Por ce que il fu gros par cors ,
ce poise lui , remet dehors ;
trait soi devers la barbacane .
Et Renart , devers meriane ,
por reposer se traist ariere
en mi le fonz de sa taisniere :
il avoit ja garni sa fouse
d ' une geline grasse et grosse
et avoit mangié au matin
une cuise d ' un gras poucin ;
si se repose a grant aaise .
A tant es vos Brun a la haise :
" Renart , fait il , parole a moi:
je sui Brun , mesagier le roi .
Venez ça fors en ceste lande ,
si vos dirai que il vos mande . "
Renart set bien ce est li ors ;
bien l ' a reconneü au cors ;
si se conmence a porpanser
conment il se porra tanser .
En grant paine est d ' estudïer
comment le puisse conchïer .
" Bruns , fait Renart , biax douz amis ,
com an grant poine vos a mis
qui ça jus vos fist desvoier !
Je m ' en devoie a cort aler ,
mais qu ' eüsse mangié ainçois
d ' un merveilleus mangier françois .
Sire Bruns , mais vos ne savez ,
l ' en dit a cort: " Sire , lavez "
au riche home , quant il i vient .
Gariz est qui ses manches tient:
de premier dou buef a l ' egrés
apres vienent li autre mes ,
qant li sires en viaut avoir .
Mes povres hom qui n ' a avoir
fu faiz de la merde au deauble :
ne siet a feu , ne siet a table ,
einz menjue sus son giron .
Li chien li vienent en viron
qui li tolent le pain des mains .
De .II foiz boivre , c ' est dou mains ;
por nient se regarderoit
qui plus de .II . foiz beveroit .
Les os vos ruent li garçon ,
qui sont plus fel que hermeçon .
Chascun tient son pain en son poing ,
que tot sont feru en un coing
et li senechal et li queu ;
en tel chose ont li seignor preu
dont li sergant ont a planté :
tuit fuissent il ars en un ré !
La char reponent et les pains
qu ' il envoient a lor putains .
Por tel afaire com vos di ,
biax tres douz sire , puis midi
ai ge toz mes maus aünez ,
dont je me sui desgeünez ,
et si ai mengi .VI . danrees
de novel miel en bonnes rees .
- Nomini Patre , Cristum fille ,
dist Bruns , por le bel cors saint Gile ,
Renart , ce miel dont vos abonde ?
Ce est la riens en tot le monde
que mes las vantres plus desirre ;
car m ' en donez ore , biau sire ,
por le cuer bieu , la moie coupe ! "
Et Renart li a fait la loupe ,
si rit por ce qu ' il le deçoit ,
mes li chaitis ne s ' aparçoit ,
et si li ploie la corroie .
" Bruns , dist Renart , se je savoie
que je trovasse en toi fïence
ne seürté ne alïance ,
foi que je doi mon fil Rovel ,
de gentil miel fres et novel
vos enpliroie encui le ventre ;
que ci devant , si con l ' en entre
el mes Lenfroi le foretier . . .
Mes que vaut ce ? ce n ' a mestier ,
que se je or vos i menoie
et de vostre preu me penoie ,
si m ' en ferïez male part .
- Que avez dit , sire Renart ?
mescreez me vos or de rien ?
- Oil . - De coi ? - Ce sai ge bien :
de traïson , de felonie .
- Renart , or oi ge vilenie ,
qant de tel chose me sordites .
- Non fais ! or en soiez toz quites :
ne vos en port plus mal corage .
- Vos avez droit , que , par l ' omaige
que je fis Noble le lion ,
je n ' ai a vos entencion
d ' etre traïtres ne trichierres .
- Bien vos en croi , dist li lichieres ;
je n ' en quier autre seürté :
mis me sui en vostre purté . "
Qant qu ' il li dist , cil li ostroie .
A tant se sont mis a la voie ;
onques n ' i ot cheval tenu
de si a tant qu ' il sont venu
au mes Lenfroi le foretier :
la sont aresté li destrier .
Lanfroi , qui le bois dut defandre ,
un chene a coumencié a fendre ;
.II . coinz de chene toz entiers
i avoit mis un foretiers :
l ' un des coinz si avoit fait pendre
et 1 ' autre aprés por le mieuz fandre .
" Bruns , fait Renart , biaux douz amis ,
vez ci ce que je t ' ai promis ;
g ' i avendroie d ' un fuisel . "
Et Bruns li ors mist le musel
el chene et les .II . piez devant ;
et Renart va les coinz levant
et a drecié encontremont .
De loing esta , si le semont:
" Di va , faist il , ovre la bouche :
a poi que la lange n ' i toche . "
Bien le conchie , bien le bole :
" Filz a putain , ovre la gole ,
Que tu vanras ja a la ree . "
Endementres que cil i bee ,
Renart a les coinz enpoingniez
et a grant poine fors sachiez ;
et qant li coing furent osté ,
la teste Brun et li costé
furent dedanz le chesne anclos .
Lors fu li las en mal repos :
estraint le cuir et lieve haut ,
a poi que li cuers ne li faut .
Mout l ' avoit mis en male presse
Renart , qui ja n ' en ait confaisse ,
qui ainz ne fist bien ne aumosne .
De loing esta , si le ranpone :
" Bruns , fait il , je savoie bien
que querïez art et engien ,
que ja dou miel ne mengerai ;
mais je sai bien que je ferai ,
s ' une autre foiz l ' avoie a faire .
Com estes ore de pute aire ,
qant de ce miel ne me puiriez !
Ahi ! com vos cuiderïez
moi a saint Gile en ferté ,
se je cheoie en povreté ;
vos m ' eslierïez poires moles . "
A tant es vos par cez paroles
sire Lanfroi le foretier ,
et Renart se mist au frapier .
Qant il a veü Brun l ' or pandre
Au chaisne que il devoit fendre ,
a la vile s ' en vint le cors
criant : " Seignor , ça est li ors !
ja le porroiz as poinz tenir . "
Qui lors veïst vilains venir
et fremïer par mi la rue !
Qui porte hache , qui maçue ,
qui flael , qui baston d ' espine :
grant poor a Bruns de s ' eschine .
Devant lui vient Hurtevilain
et Joudoïn Trouseputain
et Baudoïn Porteciviere ,
qui fout sa fame par derrieres ,
Girout Barbete qui l ' acole
et un des fiuz sire Nichole
et Trosseanesse la puant ,
qui por la moche va fuiant ,
et Corberant de la Ruelle ,
le bon voideor d ' escüelle ,
et Tiegerins Brisefouace
et li fil Tieger de la Place .
Qant l ' ors ot des vilains la rage ,
fremist et panse en son corage
miauz li vient il le musel perdre ,
einz que Lainfroiz le puisse aerdre
qui devant vint a une hache .
Bruns se restraint , sache et resache ;
tant a sachié que a grant paines
estant les piaus , ronpent les vaines
et fant le cuir , la tesste quasse ;
mes dou sanc i laise grant masse ,
les piaux des piez et de la teste .
Einz ne vit nus si laide beste :
de sanc ot covert le musel ,
entor le vis n ' ot tant de pel
dont l ' en feïst une viez borse .
Fuiant s ' an va le fil a l ' orse .
Par mi le bois s ' en va fuiant
et li vilain aprés huiant .
Li ors s ' en va vers une roche ;
et li prestres de sa paroche ,
qui peres fu Martin d ' Orliens ,
revenoit d ' espandre son fiens ,
si le feri par mi les rains ;
et li freres Chievres de Rains ,
cil qui fait pingnes et lanternes ,
ataint l ' ors entre .II . citernes :
d ' une vete de buef qu ' il porte
li a toute l ' eschine torte ;
et d ' autres vilains i a tant
qui a tiniex le vont batant
a molt grant paine s ' en eschape .
Or iert Renart pris a la trape ,
se Bruns li ors le puet ataindre .
Mes il l ' a oï de loin plaindre ,
si se remist a une adresce
a Maupertuis , sa forteresce ,
ou il ne crient ost ne agaist .
Au trespasser que Bruns a faist ,
li a Renart ses gas lanciez :
" Bruns , fait il , estes avanciez ,
ce dit Renart , dou miel Lanfroi
que vos mangié avez sanz moi ?
Vostre male foiz vos parra ;
certes si vos en mescharra
que j a en la fin n ' avrez pretre .
De quele ordre volez vos estre ,
qui rouge chaperon avez ? "
Li ors estoit si adolez
que ne li pot respondre mot ;
fuiant s ' en va plus que le trot :
encor cuide cheoir es mains
Lanfroi et les autres vilains .
Tant a alé esperonant
que par devant none sonant
est revenuz en la quarriere
ou li lions tint cort pleniere .
Pasmez est cheüs li chaitis ;
li sans li cuevre tout le vis
et si n ' aporte nule oreille .
La cort le tint a grant merveile .
" Bruns , fait Grinbert , qui t ' a ce fait ?
Malement t ' a le chapel trait :
il ne t ' en a gaires laissié . "
Cil avoit tant de sanc laissié
que la parole li failli :
" Rois , fait il , issi m ' a bailli
Renart con vos poez veoir . "
A tant li va as piez cheoir .
Qui lors veïst le lion braire ,
par mautalant ses crins detraire !
Et jure le cuer et la mort .
" Bruns , dist li rois , Renart t ' a mort ,
ne cuit qu ' autre merci en aies ;
mes par la mort et par les plaies
je en ferai si grant vangence
q ' on en parlera jusqu ' an France .
Ou este vos , Tibert le chat ?
Alez moi tantost por Renart ;
dites moi au rous de pute aire
que il viengne a cort por droit faire
en ma sale devant la gent ;
si n ' i aport or ne argent
ne parole por lui desfandre ,
fors la hart a sa geule pandre . "
Tibert ne l ' osa refuser ,
que , s ' il le poïst trestorner ,
encor fust sanz lui le santier ;
mes , ou enviz ou volentier ,
couvient au sane aler le prestre ,
et Tibert se mist en senestre .
Tant a la mule esperonee
par mi le fonz d ' une valee
que venuz est au mes Renart .
Lors reclama saint Lïenart ,
qui délivrer sieut les prisons ,
qui le gart par ses oroisons
des mains Renart son conpaignon ;
car il le tient mout a gaingnon
et a beste de pute foi :
nes Dieu ne porteroist il foi .
La riens qui plus le desconforte
ce fu , qant il vint a la porte ,
entre le fraisne et le sapin
a veü l ' oisel saint Martin ;
assez hucha : " A destre ! a destre ! "
et li oisiaux torne a senestre ,
Tibert s ' estut une grant pose :
si vos di que ce fu la chose
qui plus l ' amate et plus le donte .
Li cuers li dist que il avra honte
et grant annui et grant vergoigne ;
mout doute Renart et resoigne
qu ' il n ' ose entrer en sa maison .
Par defors conte sa raisson ,
mais il n ' i avra ja gahaing .
" Renart , faist il , biax douz conpaig ,
di moi , ies tu or ça dedanz ? "
Ce dist Renart entre ses danz
tot coiement que nus ne l ' oie :
" Tibert , par vostre male joie
et par vostre male avanture
soiez entrez en ma pasture !
si serez vos , s ' engin n ' i faut . "
Et puis li respondi en haut :
" Tibert , dist Renart , huilecome !
Ausi com venisiez de Rome
ou de saint Gile hautement ,
bien saiez venuz bonement
com a haut jor de Pantecoste " ;
que biau parler riens ne li coste ,
einz le salue mout briement .
Tibert li a dit bonement ;
" Renart , nel tenez a desroi ;
je vaing ici de par le roi ;
ne quidez mie je vos hace .
Li rois vos het et vos menace
et Bruns et Isangrin li cous ;
toz li mondes se plaint de vos ;
vos n ' avez en la cort voisin
fors danz Grinbert vostre cousin .
- Tibert , or laissiez ce ester :
d ' autre chose convient parler .
Ge vivrai tant com ge porroi ;
g ' irai a cort et si orroi
qui vers moi vodra nïent dire .
- Ce estera savoir , biau sire ,
et jel vos lou , quar je vos aim .
Mes je ai certes si grant faim
que tote en ai corbe l ' eschine .
Avez vos ne coc ne geline
ne chose c ' on peüst mengier ?
- Tros menez ore grant dangier ,
ce li respont Renart ; baraz
de soriz grases et de raz ,
ce cuit vos n ' en gouterïez .
- Si feroie . - Non ferïez .
- De ce ne serai ja lassez .
- De ce vos donrai ge assez
le matin au soloil levant .
Or me suivez , g ' irai avant . "
A tant issi de sa tesniere
et Tibert le sieut par derriere ,
qui n ' i entent barat ne gile .
Traiant viennent a une vile
ou n ' avoit que .xxx . meisons .
" Tibert , savez que nos ferons ?
ce dist Renart ; ci maint un prestre ,
si connois bien trestot son estre :
assez a froment et avoine ,
mais les soriz li font grant paine ;
mengié en ont ja près d ' un mui .
N ' a encor gaires que g ' i fui ;
mais je lor fis une saillie :
.x . en reting en ma baillie
et les .v . mis en mon estui
et la sisieme menjai hui .
Vez le pertuis par ou g ' i entre .
Passe outre , saoule ton vantre . "
Mais li lechieres li mentoit ,
qar li prestres qui la menoit
n ' avoit ne orge ne avaine :
de ce n ' estoit il ja en paine .
Toute la vile le plaignoit
por une putain qu ' i tenoit ,
qui mere estoit Martin d ' Orliens ;
si l ' avoit gité de granz biens
que il n ' avoit ne buef ne vache
ne autre beste que je sache ,
fors .x . gelines de parage .
Renart l ' en avoit fait domage
de .II . gelines et d ' un coc ,
et Martins , qui puis ot le froc
et qui puis fu moines randuz ,
avoit au trou ses laz tenduz
por prandre Renart le gorpil .
Diex gart au provoire tel fil
qui aprant si bien a barat
panre quide gorpil et chat !
Et Renart l ' enging savoit bien ;
a son conpaignon n ' en dit rien .
" Tibert , passe outre , dist Renart ,
fi ! merde , con tu ies coarz !
je garderai par ça defors . "
Et Tibert lance outre son cors ,
mes n ' i trueve froment ne orge ,
et li laz li fiert en la gorge ;
tire et sache Tibert li chaz ,
mes par le col le tient li laz ;
eschaper quide ; ne li vaut ,
qar Martinet li clers li saut :
" Or sus , or sus ! fait il , biau pere ;
aïde , aïde ! bele mere ,
alumez la chandele au feu :
li gorpiz est alez au treu . "
La mere Martinet s ' esvoille ,
saut sus , s ' alume la chandele ,
en sa main tint une quenoille ;
et li prestres qui tint s ' endoille
erranment est dou lit sailli .
Lors fu Tibert mout asailli ,
qu ' il prist .c . cous de livroison
einz que il issit de prison .
Fiert le li prestres , sa soignant ,
et Tibert ot le dan poignant
esgarde la coille au provoire ;
si con nos trovons en l ' estoire ,
aus danz et aus ongles fandanz
li adouba un des pandanz .
Qan la fame a veue la perte
et l ' uevre vit ensi aperte ,
.III . foiz s ' est chaitive clamee
et a la quarte s ' est pasmee .
Au duel que Martinet menoit
de sa mere qui se pasmoit ,
menja Tibert as denz les laz :
ensi en eschapa li chaz .
Il a esté mout lesdangiez
et an la fin s ' est il vangiez
dou prestre qui si le bastoit .
Hé ! Diex , com il se vengeroit
de Renart , s ' il iert au deseure ;
mais li lechierres , puis cel eure
que Martinet dist : " Levez sus ! " ,
onques n ' i vost areter plus ;
einz s ' en revint a son repeire .
Et cil remest por le mal traire :
qui donc oïst Tibert le chat
Renart maudire et son barat !
" Aï ! dist il , Renart , Renart ,
ja Dieu n ' ait an vostre ame part !
Bien deüse estre chastoiez ,
que tantes foiz sui conchïez
par les engins Renart li rous .
Et li prestres , li mavés cous ,
Diex li doint mal traire et pou pain
a lui et a s ' orde putain
qui or me fist cele envaïe !
Mes un des pandanz n ' a il mie ;
vengié en ai bien sa paroche :
ne sonera mes c ' une cloche .
A Martinest , son fil , d ' Orliens
onques ne croise en lui nus biens ,
qui hui matin m ' aloit batant .
Ja ne viv ' il que sol itant
qu ' il ait esté moignes randuz
et puis par larecin panduz . "
Tant a sa plainte demenee
qu ' il est venuz a la valee ,
dedanz la cort ou li rois siet .
Ou qu ' il le vit , as piez li chiet
et li raconte les merveilles .
" Diex , dist li rois , quar me conseilles .
Mout par est ci grant deablie
de Renart qui si nos conchie ,
ne je ne puis trover nului
qui me venge de son anui .
Sire Grinbert , je m ' en mervoil
se ce est par vostre conseil
que dant Renart m ' a ensi vil .
- Je vos plevis , sire , nenil !
- Alez dont tost , si l ' amenez ;
gardez sanz lui ne retornez .
- Sire , ce ne puis je pas faire :
Renart est tant de mal afaire
bien sai que je ne l ' amanroie ,
se vostre seel n ' i portoie ;
mes si veoit vostre seel ,
foi que je doi saint Israel ,
ja nul essoigne nel tanra :
lor qui ge que il i vianra .
- Tu as bien dit , fait l ' enperiere .
Lors li devise la matere
et Baucenz li senglers l ' escrit
et seela si com il dist ;
puis bailla Grinbert le seel .
Et il s ' en va par un prael ,
aprés se mist par un grant bos ;
mout li sua la piau dou dos
einz qu ' il venist au mes Renart .
Au vespre trueve son essart ,
un santier qui bien le conduist
au mes Renart devant la nuit .
Li mur i sont en un destroit ;
par un guichet que il savoit
entre Grinbert ou premier baille ;
Renart , qui crient que ne l ' asaille ,
qant il oï l ' esfroi venir ,
pres de meson se va tenir
tant que il sache la verté .
Ez vos Grinbert en la ferté :
au pont torneïz avaler ,
au petit cors et au passer ,
a ce qu ' il entre en sa tesniere
le cul avant , la teste arriere ,
l ' a bien Renart reconneü
einz que de plus pres l ' ait veü .
Grant joie en fait et grant solaz ,
si li giete au col les braz ;
por ce qu ' il estoit ses cousins
li mist desoz lui .II . cousins .
De ce tin ge Grinbret a sage
qu ' il ne vost dire son mesage ,
si a primes mengié assez .
Et quant li mengiers fu passez :
" Sire Renart , ce dit Grinberz ,
vostre baraz est trop apert .
Savez vos que li rois vos mande ?
Ne mande pas , ainçois conmande
que vos li vaigniez faire droit
par devant lui ou que il soit .
Prandra ja vostre guerre fin ?
Que demandez vos Isangrin
ne Brun l ' ors ne Tibert le chat ?
Mar veïtes vostre barat :
se ne prenez autre confort ,
ja n ' en avrez el que la mort ,
ne vos , ne tuit vostre chael .
Tenez , si brisiez cest sael ,
gardez que la letre vos dist . "
Li lechierres tranble et fremist ;
par grant paor le seel brise ,
voit que la letre li devise ,
si soupira au premier mot :
bien sot dire ce que i ot .
" Messires Nobles li lions ,
qui par totes les regions
est des bestes et rois et sires ,
mande Renart honte et martire
et mortel guerre et grant contraire ,
si ne li viaut orandroit faire
droit et raison devant sa gent ;
si n ' i aport or ne argent
ne parole por lui desfendre ,
mais la hart a sa gole pandre . "
Qant Renart oï la novele ,
le cuer li faut soz la memele
et li vïaires li nerci .
" Por Dieu , fait il , Grinbert , merci ;
conseilliez cest dolent chaitif .
Mout hé l ' ore que je tant vif ,
que je serai demain panduz .
Diex ! quar fuse or moines randuz
a Cluigni ou a Clere vaus ;
mes je sant moines a si fax
que je criem ne me mesavaingne ,
se ge faz tant moignes devainne . "
Dist Grinbert : " De ce n ' ai ge cure .
Vo estes en grant avanture
demain de morir ou de vivre ;
tant con vos estes a delivre
conseilliez vos a moi briement ,
si irons plus seürement . "
Et dist Renart : " Sire Grinbert ,
cest consel tieng bon et apert ,
que , se je vos di ma confesse ,
einzçois que li besoinz m ' apresse ,
de ce ne me puet venir max :
se je i muir , si serai saus .
Or entendez a mes pechiez .
Sire , g ' é esté entechiez
de Hersent , la fame Isangrin ;
mais ore vos di en la fin
que ele est a droit mescreüe ,
que voirement l ' ai ge foutue .
Or m ' en repent , Diex ! moie corpe ,
qant onques li bati la crope .
Isangrin ai ge tant mesfait
que je n ' ai envers lui nul plait ,
Diex atort m ' ame a garison !
.III . foiz le fis metre en prison ,
si vos dirai en quel maniere .
Jel fis cheoir en la loviere ,
la ou il vost mangier l ' aignel :
la ot tant batue la pel
qu ' il prist .C . cous de livraison
einz qu ' il issit de la prison .
Gel fis ou bresil herbergier :
la le troverent li bergier ,
sel batirent com asne a pont .
.X . bacon Savoie en un mont
chiés un prevoire en un mostier :
de chascun li fis tant mengier
n ' en pot issir , si fu emflez ,
par le pertuis ou fu entrez .
Gel fis seoir en la gelee
tant que sa qeue i fu jalee .
Gel fis peschier en la fontaine .
la nuit que la lune fu plaine :
de l ' onbre blanc et de l ' image
cuida por voir ce fust fromage .
Et si refu por moi traïz
devant le char au pleseïz .
.C . foiz l ' ai recreü et mat
par droite force de barat .
Ge li fis tant que il fu moignes
et en aprés fu il chanoines ,
qant je li fis la char mangier .
Bien me deüst on escorchier ,
je ne vos avroie hui retrait
la honte que je li ai fait .
Ge fis cheoir Tibert es laz ,
qant il cuidoit trover les raz .
De tot le lingnage Pintein ,
fors seulement li et s ' antein ,
n ' i a remés coc ne geline
dont je n ' aie fait decepline .
Qanz li oz fu devant mon crués
de sanglers , de vaches , de bués
et autres bestes bien armees
que Isangrin ot amenees ,
por ceste guerre traire a fin
retin Roounel le matin .
Bien furent .XXX . conpaignon ,
que chien , que lisses , que gaignon ;
tuit furent batu et ploié ,
mes malement furent paié ,
que jes servi de lor soudees .
Qanz les oz furent assamblees ,
par guile et par conchïement
lor toli ge lor paiement ;
au departir lor fis la lope .
Or m ' en repent , Diex ! moie coupe .
A tot le mont ai fait anhui ,
dolanz et repantanz en sui ;
or doi venir a repentance
de ce que j ' ai fait en m ' enfance .
- Sire Renart , ce dit Grinberz ,
vos pechiez m ' avez descoverz
et le mal que vos avez fait ;
se Diex vos gete de cest plait ,
gardez vos bien de rancheïr .
- Ja Diex ne me puist tant haïr ,
ce dist Renart , que tant mesface
que a nelui riens ne mesface ! "
Il li otroia ce qu ' il vost ,
puis le baisa et si l ' asout ,
moitié romanz , moitié latin .
Et Renart , quant vint au matin ,
laissa sa fame et ses anfanz ;
au departir fu li diaus granz .
Congié a pris de sa mainie :
" Enfanz , fait il , gentil lignie ,
que qu ' il de moi daie avenir ,
pansez de mon chastel tenir
contre contes et contre rois ,
que vos ne troverez des mois
conte , prince , ne chastelaine ,
qui vos forface une chastaigne .
Qant vos avrez le pont levé ,
ne serez la por nul grevé ,
que vos avez asez vitaille :
ne cuit devant un an vos faille .
Qu ' iroie je chascun nomant ?
a Damedieu toz vos conmant ,
qui me ramaint si con je soil . "
A tant feri le pié au soil ,
au parissir de sa tesniere
a conmencïe sa priere :
" Diex , fait Renart , omnipotens ,
gariz mon savoir et mon sens
que ne le perde de paor
devant le lion mon seignor ,
qant Ysangrin m ' encusera ,
de quant qu ' il me demendera
que je li sache raison randre
ou bien noier ou bien desfandre .
Lai m ' en sain et sauf repairier ,
que je mon cuer puisse esclairier
de cix qui me mainent tel guerre . "
Lors se coucha endanz a terre
et .IIII . foiz se rant coupable ,
puis se saingne por le daiable ,
et por dant Noble le lion
mout fu en grant afflicion .
Or s ' an vont li baron a cort
et passent l ' aive qui la cort
et les destroiz de la montaigne ;
aprés entrent en la chanpaigne .
An ce que Renart se demente ,
endui ont perdue la sente ,
la voie et le chemin ferré ,
et neporqant tant ont erré
que il furent en mi uns plains
lez une grange de nonnains .
La cort estoit mout bien garnie
de toz les biens que terre crie ,
d ' annes et d ' autres noreçons .
Dist Renart : " Quar nos adreçons
a cele cort vers les gelines :
illuec , par devers ces espines ,
est la voie que nos laissons .
- Renart , Renart , dist li taissons ,
Diex set bien por coi vos le distes .
Filz a putain , leres traïtres ,
dont n ' estes vos a moi confés
et volez rancheoir aprés ?
Ensi as tu Dieu renoié ? "
Cil dist : " Je l ' avoie oublié .
Alons en , vez me ci tost prest .
- Renart , Renart , por noient est .
Danz parjurez , danz renoiez ,
vos ne serez ja chastoiez .
Or me di , fole creature :
tu ies de mort en aventure ,
si as dit ta confession ,
et si viax faire ocission !
Certes granz pechiez te cort seure ;
toute soit maleoiste l ' eure
que tu cheïs sor terre mere ;
dolante puet estre la mere
qui te porta a itele eure
que toz li mondes te deveure . "
Andui s ' en vont souef anblant .
Cil n ' ose faire autre sanblant
por son cousin qui le chastie ,
et neporquant sovent coulie
vers les gelines cele part ;
dolanz est quant il s ' an depart :
mises les eüst a raison ,
se ne fust Grinbert le taisson .
Or s ' an vont li baron ensanble .
Diex ! com la mule Grinbert amble ;
mais li chevax Renart acoupe ,
li flans li bat desoz la croupe :
mout crient et doute son seignor ,
onques paor n ' ot mes greignor .
Tant ont erré , a plain , a bos ,
et l ' anbleüre et les galos ,
et ont tant la montaigne alee
qu ' i sont venuz a la valee
qui vers la cort le roi avale ;
par le pont entrent en la sale .
Si tot com Renart entre a cort ,
il n ' i a beste ne s ' atort
ou de clamer ou de respondre .
Or est Renart pres de confondre ;
n ' en tornera que ne s ' en quisse ,
qant Isangrin ses danz aguise
et Tibert li chaz se conseille
et Bruns , qui la teste a vermioille ,
et Chanteclers pas ne sonmoille
et Raonniaux se raparoille .
Mais , qui aint ne hace Renart ,
ne fait pas chiere de coart ;
einz conmence en mi la maison ,
teste levee , sa raisson :
" Rois , dist Renart , je vos salu
com cil qui plus vos a valu
que tuit li baron de l ' ampire .
Dahé ait qui vers vos m ' enpire !
Ne sai que c ' est par mal eür ,
einz ne fui encor aseür
de vostre amor un jor entier .
Je parti de vos avant ier
par vostre gré et par amor ,
sanz mal talant et sanz iror ;
or ont tant fait li losengier
que de moi se veulent vengier
et vos m ' avez jugié a mort .
Mes , sire , puis que rois s ' amort
a croire les mavés larrons
et il laisse les haut barons
et guepist le chief por la queue ,
puis va la terre a male veue ,
que cil qui sont serf de nature
ne sevent esgarder mesure .
S ' il pueent en cor alever ,
mout se painent d ' autrui grever ;
mes chiens familleus en cuisine
n ' a cure de beste voisine .
Cil font la povre gent tüer
et les monnoies remüer ;
cil amonnestent mal a faire ,
mais bien en sevent lor preu faire
et enborser autru avoir .
Mes ce vodroie ge savoir
que Bruns et Tiberz me demande .
Il est voirs , se li rois conmande ,
que bien me püent faire lait ,
encor ne l ' aie ge forfait
et ne sevent dire por coi .
Se Bruns menja le miel Lenfroi
et li vilains le ledanja ,
por coi donc ne se revenja ?
Ja a il tex poinz et tex moes
et tiex musiau et teles joes .
Et se sire Tibert li chaz
menja les soriz et les raz ,
s ' il fu pris et l ' en li fist honte ,
por les sainz Dieu a moi que monte ?
Ja ne sui ge prevoz ne mere
que je l ' en doie nul droit faire :
volent moi ice demander
que il ne püent amander .
D ' Isangrin ne sai ge que dire :
ce ne puis ge pas esconduire
que je n ' aie sa fame amee ,
mes puis que ne s ' en est clamee
et puis qu ' i n ' i ot braies traites ,
ne huis brisiez , ne portes fraites ,
s ' ele m ' a chier et ele m ' ame ,
cil fous jalous de coi se claime ?
Est il por ce droit c ' on me pande ?
Nenil ! sires Diex m ' en desfande ,
biau sire , et vostre roiautez
et la foi et la lïautez
que je ai toz jorz maintenue .
Mes or ai la gorje chanue ,
viaux sui , ne me puis mes aidier
si n ' ai mes cure de plaidier .
Pechié fait qui a cort me mande ;
mes qant messires le conmande ,
il est bien droiz que je i vaigne :
or sui devant lui , si me praigne
et si me face ardoir ou pendre ,
q ' autr ' outre lui ne me doit prandre ,
ne n ' avroie pas la puissance ;
mes ce sera povre vengence ,
s ' en parlera l ' en malement ,
se je i muir sanz jugement .
- Renart , Renart , dist l ' enperiere ,
dehaiz ait l ' ame vostre mere
qant ele ne vos avorta ,
qant en son ventre vos porta .
Or me dites , traïtres lerres ,
por coi este vos si menterre ?
Bien savez toujorz losengier ,
mes riens n ' i vaut , n ' i a mestier ,
ne voz colors de rectorique .
Assez saveriez de fusique ,
se vos ainsi vos eschapez ;
puis que ci estes atrapez
n ' i a mestier saïn de chat :
hui finera vostre barat ;
trop savez de la fauve anesse ,
s ' en avrez hui vostre promesse .
- Sire , sire , dist li taissons ,
se nos vers vos obaïsons
por bien faire et por droiture ,
par raison , par san , par mesure
ne devez pas le mal traitier ,
mais la pais faire et afaitier ,
se vos metez or malement ,
mes par foi et par jugement .
Or oiez , si ne vos annuit :
Renart est venuz en conduit
por droit faire et por amender
ce c ' om li savra demender ,
s ' est qui de lui face clamor
et vos l ' otroiez par amor . "
Ainz que Grinberz eüst finee
sa raison et determinee ,
se leva em piez Ysangrins
et li moutons sires Belins ,
Tibert li chaz et Roonniax
et li dainz mesires Platiaux
et Bruns , qui son vis avoit ters ,
et sire Brichemers li cers ,
Marcins li chevriaus et Bruianz
li tors et li mulez Muianz .
Qant li conciles fu ensanble ,
Renart li rous fremist et tranble :
bien set que sa mort est juree ,
ne puet mes estre destorbee .
Or vodroit estre a Maupertuis ,
si fermeroit mout bien son huis ;
s ' encor i venoit dant Grinbert
et Bruns li ors et dant Tibert
et sire Nobles li lions ,
s ' eüst o lui toz ses barons ,
nou trairoient de la tainiere ,
tant est la terre fort et fiere .
Mes or est Renart pris au laz
et set bien ce n ' est mie a gas ;
bien set ne se puet or desfandre :
a male hart le feront pandre .
Or sont asanblé li baron ,
si parleront dou mal laron .
Or escoutez de dant Belin ,
qui n ' ama onques Isangrin ,
qar il le vost l ' autrier mengier ;
or se vodra de lui vangier .
" Isangrin , trop estes jalus .
Et quoi ? se Renart vos fist cous ,
ce fist il por le vostre bien .
Se vos asailloient li chien
et venissiez a un fousé
auques parfont et auques lé ,
en istrïez vos sanz dolor ,
ne porrïez avoir paor :
savez c ' on dist au cous mauvés ,
s ' il vient a pont qui soit desfez :
" Passez outre : se vos chaez ,
" saiez seür vos floterez . "
A icest mot Belin se taist ;
sa parole mie ne plaist
a ceus qui haïrent Renart
por ce qu ' il sot trop de barat .
Bruienz parla , qui fu haitiez ,
que sor Belin fu mout iriez :
" Sire Belin , laissiez ester :
nos n ' avons soing de ranponer .
Je quit Renart vos a loé
et de son miel vos a doné ,
mais , par la foi que je vos doi ,
je mie cest plait je n ' otroi .
Se Renart n ' est encui panduz ,
dont li serez vos bons escuz .
Seignor , quar dites en viron
que ferons nos dou mau larron ,
dou püent rous , dou sodoient
qui toz jorz nos va conchïant ? "
Brichemer a parlé aprés ,
qui de parler fu mout engrés :
" Entendez tuit , fait il , a moi :
je vos conmant , de par le roi ,
que Renart soit enuit desfaiz . "
Aus barons plaist mout icest plait :
en tor sont li baron venu ,
s ' ont Renart pris et retenu .
Tuit escrïent : " Or a la hart !
que nos pandromes ja Renart ,
que ses baraz ne l ' en guerra :
ja vis de ci n ' eschapera . "
Li conciles fu asanblez
et Renart ot les iauz bandez .
Or l ' en mainent as forches pandre ,
ha ! las , qu ' il ne se puet desfandre ;
mout volentiers s ' en eschapast
et a Malpertuis s ' en alast
et fust en sa meson a aise ,
mais il ne puet que Dieu ne plaise .
Or est Renart pris et lïez .
Dex ! com Isangrin en est liez
et Pinte et Chantecler li cos !
qar or cuident estre en repos ;
mes , se de ci pooit garir ,
il les feroit encor saillir :
tiex en gerroit geule baee ,
qui or a la teste levee ,
qui serroit dolanz sor sa sele ;
tiex nel prise ore une cenele ,
se de ci pooit eschaper ,
il les feroit encor plorer .
Mout est Grinbert en grant martire ,
por son cousin plore et soupire ;
or vait ester devant le roi :
" Sire , je vos plevis ma foi ,
si vos donroi bone alïence ,
Renart ne vos fera pesance
ne nul home jor de sa vie ,
s ' eschaper puet ceste foïe .
Por Dieu , si esgardez raison :
aiez merci de vo baron .
S ' il est panduz , sachiez de fi ,
tuit si parent ierent honi ,
avillié en seront toz dis .
Mes se il en eschape vis ,
je li ferai panre la croiz :
je vos en pri a haute voiz ,
fait Grinbert , que vos li doingnez . "
Adonc li ostroia li rois .
Lors le fist li rois amener ,
en son estant le fist lever .
" Aï , fait il , rous de pute aire ,
tant par ies or de mal afaire
et si es male criasture .
Certes en toi pecha Nature ,
qant tu ne puez a bien entendre ,
filz a putain , dines de pandre . "
Devant le roi fu en estant
Renart , si dist an soupirant :
" Ha ! gentis rois , por Dieu merci ;
tenez ma foi : je vos afi
ja mes clamor n ' orez de moi ,
jel vos promest en bone foi .
- Par toz les sainz de Belleant ,
se mes en oi ne tant ne quant ,
sachiez le bien , sanz demorance
panduz sera a une branche . "
Renart l ' antant , grant joie en a :
aus piez le roi cheoir ala ;
li rois l ' en aide a lever ;
la croiz conmende aporter .
Danz Bruns li ors li a portee ,
en s ' espaule li a fermee .
Qant l ' ot , si en ot mout grant joie :
ne sai s ' il fornira la voie ,
mais , coument que il doie estre ,
la croiz a sor l ' espaule destre ;
escharpe et bordon li aportent .
Les bestes mout se desconfortent :
cil qui anpaint et boté l ' ont
dïent qu ' encor le comperront .
Es vos Renart le pelerin ,
l ' escharpe au col , bordon frainin .
Li rois li dist qu ' i lor pardont
trestoz les max que faiz li ont
et deguerpisse engin et maux ;
lors , se il muert , si sera saus .
Renart ne met riens en defois
de ce que li pria li rois ,
einz otroie trestoz ses diz
tant que i fu d ' iluec partiz ;
ront le festu , si lor pardonne .
Un pou se part de cort ainz none ;
onques nus d ' aus ne s ' areta ,
dedanz son cuer les desfia ,
ne mes que le roi et s ' espouse ,
madame Fiere l ' orgeillose ,
que mout estoit cortoise et bele ;
Renart mout gentement apele :
" Sire Renart , proiez por nos
et nos reprïerons por vos .
- Dame , fait il , vostre proiere
doi ge certes mout avoir chiere ;
mout par devroit estre haitiez
celui por qui vos proieriez ;
et se le vostre anel avoie ,
mout en seroit miaudre ma voie .
Sachiez , se vos le me donez ,
bien vos sera guerredonnez
et donrai vos de mes joiaus
tant que vaura bien .c . aniaus . "
La roïne l ' annel li tent ;
Renart par grant amor le prent .
Entre ses danz basset a dist :
" Par mon chief , qui onques nel vit
l ' annel , certes , le conperra :
ja nule riens ne l ' an garra . "
Renart mist l ' anel en son doi ,
aprés si prist congié au roi .
Son cheval point des esperons ,
fuiant s ' en va les granz trotons ;
vers la haie s ' est aprochiez
la ou Coart s ' estoit cachiez ;
fain a plus grant que il ne siaut ,
de jeüner li cuers li diaust .
A tant s ' en entra en la haie ;
Coart le vit , mout s ' en esmaie ;
en piez se dresce de paor
et si li a euré bon jor ,
si li dist : " Sire , mout sui liez ,
qant vos estes sains et haitiez ;
forment me poise de l ' ennui
que l ' en vos a fait si grant hui . "
Renart , qui tot le monde boise ,
dist : " Qant de mon anui vos poise
et que bel ne vos est dou nostre ,
Diex doint qu ' il nos repoist dou vostre ! "
Qant Couart l ' oï , bien l ' entent ;
ne s ' aseüre de noient ,
ainz s ' aparoille de foïr ,
qar il se doute de morir ,
si se vost traire vers le plain .
Renart le saisi par le fraim :
" Si m ' aïst Diex , ce dit Renart ,
or esterez , sire Couarz ;
ja li vostres coarz chevaux
ne vos guerra de mes cheaux
ne lor en face livroison . "
Poignant le va de son bordon .
La cort le roi et si serjant
furent en la valee grant
entre .IIII . roches agües
contremont droites vers les nües ;
en la plus haute Renart monte ,
a tout Couart qu ' il fait grant honte ;
Couart panche l ' oreille aval
par desoz le ventre au cheval .
Renart , qui mout fu deputaire ,
en quide bien livroison faire
a ses anfanz sanz demorance .
Or pant Dieu de la delivrance !
Renart regarde en la gaudine
et voit le roi et la roïne ;
tant baron voit et tante beste ,
li bois fremist conme tanpeste ;
entr ' aus parolent de Renart ,
mais ne sevent mot de Coart
qu ' il enmaine en sa prison
tout autresi conme larron .
Renart a pris aus mains la croiz ,
si lor escrie a haute voiz :
" Danz rois , tenez vostre drapel :
que Diex maudie le musel
qui m ' enconbra de ceste chape
et dou bordon et de l ' escharpe . "
Son cul en tert voient les bestes ,
puis lor gita desor les testes ;
en haut parole et dist au roi :
" Sire , dist il , entent a moi :
salu te mande Loradins
par moi qui sui bons pelerins .
Tant vos criement li paien tuit
a pou que chascuns ne s ' en fuit . "
Tant lor a de ses gas lanciez
que dant Coarz est deslïez
et sist sor un cheval corant ;
un saut a fait mout avenant :
einz que Renart se regardast
ne que il garde s ' en donast ,
fu Coart bien pres de la cort
o son cheval qui bien tost cort .
Les costez avoit despeciez ,
que li bordons i fu fichiez ,
et la pel des piez et des mains
a ronpuee , n ' est mie sains .
Tant s ' est penez de l ' avancier
au piez le roi se va lancier :
" Sire , fait il , por Dieu aïe ! "
Si li conte la deablie .
" Diex , dist li rois , con sui traïz
et asotez et esbahiz
de Renart qui si pou me criant .
Or sai bien qu ' a malvés me tient .
Seignor , fait il , or aprés tuit !
Veez le la ou il s ' enfuit ;
sachiez bien , se il nos estort ,
nos somes tuit jugié a mort ,
et cil de vos qui le panra ,
toz ses lingnages frans sera . "
Qui donques veïst Isangrin
et le mouton sire Belin
et Brun l ' ors et Tibert le chat
et monseignor Pelé le rat
et Chantecler et dame Pinte ,
si con il vint a cort soi qinte ,
et seignor Ferrant le roncin
et dant Roonnel le matin
et seignor Blanchart le chevrel
et dant Tiecelin le corbel !
Frobert le suit , li gresillons ,
et Petit Porchaz li fuirons .
Aprés i va sire Bauçant ,
li sanglés as aguees danz ;
Bruanz li tors s ' est afichiez
et Brichemer s ' est eslaissiez ;
li limeçons porte l ' ansaigne ,
bien les conduit par mi la plaigne .
Renart regarde arriere soi
et voit venir la gent le roi ;
ne set souz ciel que faire doie .
Un saut a fait outre la voie ,
entrez s ' en est en une brouce ;
aprés le siut Corte la goce .
Li autre pas ne l ' aseürent ,
formant le menacent et jurent
que ja nel garra plaissaïz ,
ne femeté , ne roilleïz ,
ne forteresce , ne donjons ,
tors , ne tainieres , ne buisons ,
que il ne soit pris ou randuz
et puis escorchiez ou panduz .
Renart vit qu ' il ne pot durer
ne por foïr ne por aler ;
la bouche li va escumant ,
et si le vont si esplumant ,
si li poilent son peliçon
en haut en volent li flocon .
Ja li pertuisoient les rains ,
a poi ne chiet entre lor mains ;
mout le tienent a male trape :
mervoilles est s ' il en eschape .
Por qant si est esberuciez
qu ' a Maupertuis en est muciez ,
son bon chastel et son donjon ,
sa forteresce et sa maison ,
ou il ne crient out ne asaut :
qui viaut mais hui aler , si aut .
Sa fame a l' encontre li vient ,
qui mout l ' aime et chier le tient ;
.III . fiuz avoit la dame franche :
c ' est Percehaie et Malebranche ,
li tierz avoit non Renardiaus ,
cil fu des autres li plus biaus .
Tuit .III . li vienent en viron ,
si le tienent par le giron ;
virent les plaies qui li sainent ,
mout le dolosent et le plaignent ,
toutes li levent de blanc vin ,
si l ' asïent sor un cousin .
Li dingners fu apareilliez ;
mout par fu las et traveilliez
que ne menja que le braon
d ' une geline et le crepon .
La dame l ' avoit fait baignier
et vantouser et puis saignier ,
tant que il fu en la santé
ou il avoit avant esté .
Messires Nobles l ' enperiere
vint au chastel ou Renart ere
et vit mout fort le plaissaïz ,
les torz , les murs , les roilleïz ,
les forteresces , les donjons ,
ausi haut ne traisist nus hons ;
tout en viron son li fossé ,
parfont et haut et reparé ;
vit les torneles et les murs ,
forz et espés et hauz et durs ;
vit les creniax desus la mote
par ou l ' en entre en la croute ;
gardé sont et levé li pont
et la chaaine contremont .
Li chastiaus sist en une roche ;
li rois tant con il puet l ' aproche ,
devant la porte a pié dessant
et li baron tuit ensement .
Au chastel vienent en viron ,
chascuns i tant son paveillon ,
herbergent soi de totes parz .
Or puet avoir paor Renarz ,
mes par asaut n ' iert ja conquis
ne ne sera a force pris :
se traïz n ' est ou afamez ,
ja ne sera par aus grevez .
Renarz fu bien en sa vigor ,
montez en est desus sa tor
et vit Hersant et Isangrin ,
qui sont logié desoz un pin ;
a haute voiz li escria :
" Sire conpoinz , et coi i a ?
Que vos sanble de mon chastel ?
Veïstes onques mes si bel ?
Dame Hersant , conment qu ' il praigne ,
je vos ai folé la vandange :
ainz qu ' isisiez de ma prison ,
eüstes vos tel livroison ,
ce croi , tiex .c . cous i eüstes ,
que onques eve n ' i beüstes ;
il ne me chaut s ' iriez en est
li cous qui vos maintient et paist .
Et vos , mesires Bruns li ors ,
je vos fis ja faire tel cors ,
qant vosites le miel mengier ;
bien me cuidai de vos vangier ;
vos i laisates les orailles :
trestuit le tindrent a merveilles .
Et vos , sire Tiberz li chaz ,
je vos fis ja cheoir es laz ;
einz q ' esisiez de la prison
i eüstes tel livroison ,
je cuit , tiex .c . cous i eüstes ,
que onques gré ne m ' en seüstes .
Et vos , misires Chantecler ,
qant je vos fis le chant chanter ,
que par cele gorge vos ting ;
vos m ' eschapates par angin .
Et a vos di ge , Brichemer ,
je vos fis ja fol resanbler :
par mon anging et par mon los
eüste vos osté dou dous
.III . corroies qui mal vos firent ;
assez i ot de ceus quil virent .
Et vos , sire Pelez li raz ,
je vos fis ja tenir as chaz ,
qant vos eüstes mangié l ' orge :
il vos estraintrent cele gorge .
Et vos , monseignor Tiecelin ,
et a vos di ge , dant Belin ,
je vos fis ja mes jeus puïr :
si bien ne peüsiez fouir ,
vos i laisisiez vostre gage
con vos feïtes au fromage
que je menjai a mout grant joie
por ce que mestier en avoie .
Et vos , Rousiaus li escuriaus ,
je vos fis ja de mout granz diaus ,
qant je vos dis qu ' estoit juree
la pais et bien aseüree :
dou chaine vos fis je descendre ;
ice vos quidai ge chier vandre ,
par la qeue vos ting as danz ,
mout futes pres d ' estre dolanz .
Q ' iraie ge faisant lonc conte ?
N ' i a celui n ' aie fait honte ;
encor vos en cuit faire assez ,
einçois que cist ans soit passez ,
que l ' anel ai en ma saisine
que me dona ier la roïne :
bien sachiez que , se Renart vit ,
tel le conperra q ' ainz nel vit .
- Sire Renart , dist li lions ,
mout par est forz vostre donjons ,
mes n ' est si forz ne l ' aie pris ;
n ' en tornerai , s ' iert en feu mis .
D ' une rien bien vos aseür :
a mon vivant le siege jur ;
ne por pluie ne por orage
n ' en tornerai en mon aage
tant que li chastiaus soit randuz
et vos par la geule panduz .
- Sire , sire , ce dist Renart ,
ainsi menacent li coarz .
Mais , ainçois que il soit randuz ,
vos sera il mout chier vanduz ,
que ceanz a assez vitaille
ne cuit devant un an me faille :
si a ceanz maintes gelines
et maintes bestes hermelines ,
si a assez de gras fromages ,
grosses brebiz et grasses vaches ;
en cest chastel est la fontaine
qui mout es clere et froide et saine .
Et d ' une riens me puis vanter :
tant ne set plovoir ne vanter ,
se l ' eve dou ciel cheoit toute ,
n ' en enterroit il ceanz goute .
Cist chastiaus est si bien asis
ja par force ne sera pris .
Or vos seez , je m ' en irai :
traveilliez sui , si mengerai
avec ma fame la cortoise ;
se jeünez , pas ne m ' en poise . "
A icest mot jus s ' en avale ,
par un gichet entre en la sale .
La nuit segornent cil de l ' ost
et l ' andemain leverent tost .
Ses barons fist li rois venir :
" Seignor , fait il , del asaillir
nos covient a apareillier ,
que ce larron voil acrochier . "
A icest mot se lievent tuit ;
au chastel alerent de bruit .
Li assauz fu molt merveillos ,
einz nus ne vit si perillos :
des le matin jusqu ' a la nuit
ne finerent d ' asaillir tuit .
La nuit les a fait departir :
vont s ' en , si laisent l ' asaillir ;
et l ' andemain aprés mangier
reconmencerent lor mestier ,
einz ne s ' i sorent si pener

que pierre en poïssent lever .
Bien en fut recreüz li rois ,
einz n ' i perdi Renart un pois .
Onques ne laissierent nul jor
que n ' asaillisent a la tor ,
mes ne la porent enpirier
dont el vausist mains un denier .
Un soir estoient travoillié
et d ' essaillir mout annoié ;
chascuns dormi seürement
en sa loge priveement .
Et la roiene estoit irie
et vers le roi mout corociee :
couchiee estoit a une part .
A tant es vois issu Renart
de son chastel seürement ;
voit les dormir serreement :
chascuns gesoit delé un chaine
ou delez fou ou delez fresne .
Renart a bien chascun lïé
ou par le poing ou par le pié ;
mout par a fait gran deablie :
a chascun abre le suen lie ,
neïs le roi par mi la qeue :
grant mervoille est s ' il la desneue .
Aprés s ' en va par la roïne
la ou ele gesoit souvine ;
entre les ganbes li entra .
Ele de lui ne se garda ,
einz quidoit que ce fust le ber

qu ' a lui se vosist acorder .
Or poez oïr grant mervaille :
cil la foutoit , ele s ' esvaille ;
qant sot que Renart l ' ot traïe ,
si s ' escria come esbahie ,
et ja estoit l ' abe crevee
et jor et grant la matinee .
Por le cri sont tuit estormi
cil qui estoient endormi ;
de Renart le rous s ' esbahirent ,
qant avec lor dame le virent ,
et , por ce que il la foutoit ,
sachiez que pas ne lor plaisoit .
S ' escrïent tuit : " Levez , levez ,
et prejujié larron praiez ! "
Messires Nobles en piez saut
et sache et tire et riens ne vaut ;
a pou la qeue n ' est ronpue ,
grant demi pié est estandue .
Et li autre sachent et tirent ,
a poi li cul ne lor descirent .
Mes dant Tardis li limeçons ,
qui dut porter le confanon ,
oublia Renart a lïer :
cil cort les autres deslïer ;
trait l ' espee , si lor desnoe ,
a chascun coupe de la coue :
dou deslïer est si hastez
assez i a des antamez ;
ainçois qu ' il soient desnoé ,

sont li plusor tuit escoué .
Envers Renart s ' adrescent tuit ,
si con il pueent , au grant bruit ;
et quant Renart les vit venir
si s ' apareille de fouir .
A ce qu ' il entre en sa tainiere
Tardis le saisi par derriere ,
par mi les piez a soi le tire :
mout se contient bien conme sire .
A tant i vint li rois poingnant
et tuit li autre esperonnant ,
et dant Tardis , qui Renart tient ,
parole au roi qui devant vient ;
de totes parz le tienent tuit ,
toz li oz en fremit et bruit .
Este vos Renart qui est pris ;
mout en sont lié cil dou païs .
" Sire , dist Isangrin au roi ,
por amor Dieu , balliez le moi
et j ' an ferai tele vangance
c ' on le savra par tote France . "
Li rois n ' en vost faire naient ,
de ce sont il lié et joiant .
Les iaux ont fait Renart bander ;
li rois li prist a demander :
" Renart , Renart , dist li lions ,
ci a de tiex escrepions
qui vos vendront ore l ' outrage
que fait avez en vostre aaige
et le deport de la roïne

que vos tenïez hui sovine :
de ma honte vos vi ge prest ,
mais or sai bien comment il est .
Or vos metront ou col la hart ,
si parlerons d ' autre Renart . "
Lors Isangrin en piez se dresce ,
si prant Renart par la chevesce ,
dou poing un si grant cop li done
que li os del col l ' en resonne ;
et Bruns li ors par le giron
ses danz li mest jusqu ' au braon ;
et Raonniaus par mi la gorge
.III . torz le fist pandre a une orge ;
Tibert li chaz gita les danz
et les ongles qu ' il ot poignanz ,
Renart saisi au peliçon :
bien li valut une friçon ;
Tardis , qui porte la baniere
li a donee une cropiere .
Tant veïssiez bestes venir
que li tierz n ' i puet avenir ;
tant en i vient aval la rue ,
qui n ' i puet avenir s ' i rue .
Dant Renart , qui maint home engingne ,
fiert mainte beste et houcepingne ;
ne set soz ciel que faire puisse ,
mout crient que a morir l ' esstuisse .
Renart n ' i avoit nul ami ,
tuit li estoient anemi .
Bien savez vos certainement

ceste parole apertemant
que , puis que hom est antrepris
et par force lïez et pris ,
bien puet savoir a cel besoing
qui l ' aime et qui de lui ait soing ;
por dant Grinbert le di , qui pleure
por dant Renart c ' om si deveure :
ses paranz fu et ses amis .
Qant il le vit lïé et pris ,
ne set conment il le rescoue ,
que la force n ' est mie soue .
Pelez li raz s ' est avanciez ;
contre Renart s ' estoit lanciez ,
entre ses piez chiet en la fole ;
Renart l ' aairt par mi la goule ,
entre ses danz si fort l ' estraint
morir le fait , si le destraint ;
onques nus d ' aus ne s ' i garda ,
nus ne le vit ne regarda .
Ma dame Fiere l ' orguellouse ,
qui mout est fiere et desdaingnose ,
s ' en estoit de sa chanbre issue ;
d ' ire nercist trestoute et sue
et por Renart et por l ' anui
que devant touz li a fait hui .
Dou don de l ' anel se repant ,
qu ' ele set bien qu ' a l ' oil li pant :
contraire en cuide avoir assez ,
qant cist contraires iert passez ,
mes el n ' en viaut faire sanblant .
Son petit pas souef anblant
devant Grinbert iert arestee ,
si a parlé conme senee :
" Sire Grinbert , dist la roïne ,
mar vit Renart son mal couvine
et sa folie et son outrage :
hui en reçoit mout grant domage .
Je vos aport ici un brief :
nus n ' a paor de mort si grief ,
se l ' avoit par bone creance ,
que ja de mort eüst doutence ;
se dant Renart l ' avoit sor lui ,
il n ' i morroit mie mes hui ;
ne por droiture ne por tort
n ' avroit hui mes paor de mort .
Distes de par moi le reçoive ,
basset que nus ne l ' aparçoive ,
que grant pitié me prant de lui .
Gardez nel distes a nului ,
Grinbert , se Diex me beneïe :
je nel di pas par lecherie ,
mes , por ce qu ' il est afaistiez ,
me poise qu ' il est deshaitiez
et que tel honte li voi faire ,
que mout est frans et debonaire . "
Grinbert respont : " Dame honoree ,
franche roïne coronee ,
cil qui haut siet et tot remire
et de toz biens est rois et sire ,
qui vos a mis a grant honor ,
icil vous gart de desanor ,
que , s ' il en puet eschaper vis ,
encor sera il vostre amis . "
A icest mot le bref li tent
et Grinbert volantiers le prant ,
et la roïne li consseille
mout priveement en l ' oreille ,
et quant il sera eschapez
de la ou il est atrapez ,
que il ne laist eh nule guise ,
por l ' amor que il a anprise ,
que il a lui parler ne voise
priveement et sanz grant noise .
A icest mot se departirent .
Si anemi Renart mar virent :
enz ou col li ont la hart mise .
Mout par est pres de son joïse ,
quant Grinbert , ses cousins , i vient ,
trueve Renart qù ' Isangrin tient :
traire le viaut a force sus ;
li autre se sont trait en sus .
Dant Grinbert parla hautement ,
oiant trestoz , et sagement :
" Renart , sanz nule autre devise ,
or est venuz vostre joïse ,
par ci vos en covient aler .
Vos vos deüssiez confesser
et faire lais a voz anfanz
que vos avez petit et granz .
- Vos distes voir , se Dieu me gart :
droiz est que chascuns ait sa part .
Je lais mon chastel a l ' aizné ,
que ja n ' iert pris par home né ;
ma tor et mes granz forteresces
2036a . lais ge ma fame as beles treces ,
2036b . et mon fil l ' autre , Percehaie
2036c . lais je l ' essart Robert Fresaie
ou il a tant souriz et raz ,
il n ' en a tant jusqu ' à Araz ;
a mon petit fil Renartdel
lais je l ' essart Martin Fauvel
et le cortil derriers la granche
ou a mainte geline blanche :
assez i trovera vitaille ,
ne cuit que ja mes jor li faille ,
de ce se porra bien gairir .
Ne lor sai plus que departir .
- Pres est , dist Grinbert , vostre fins
et je sui ci vostres cousins ,
de vostre avoir aucune rien
me laisserez , si ferez bien
et si ferez mout grant savoir . "
Ce dist Renart : " Vos distes voir .
Foi que devez sainte Marie ,
se ma fame se remarie ,
tolez li ce que je li lais ,
et si tenez ma terre en pais ,
que mout m ' avra tost oublié ,
qant el me savra devïé .
Qar qant li hom gist en la biere ,
sa fome regarde derriere
s ' ele voit home a son plaisir ;
ne puet pas son voloir taisir ,
qant plus regrete et va plorant ,
que ne li face aucun sanblant .
Tout autresi fera la moie :
jusqu ' à tierz jor ravra sa joie .
Se mon seignor le roi plesoit
et une chose me faissoit
que il vousist je fusse moines ,
reclus , hermites ou chanoines ,
et me feïst vestir la here ,
certes , se ce li voloit plaire ,
icel mortel siecle et l ' anvie
lairoie : plus n ' an ai anvie . "
Dist Isangrin : " Cuivers traïtres ,
ce que est ore que vos dites ?
Tantes guiches nos avez faites
et maintes farlores atraites .
Se aviez vestue la gone ,
en vos avroit bele persone !
Ja Diex au roi ne doint honor ,
se ne vos pant a deshonor
et se il ne vos aseüre
que la harz est vostre droisture :
qui de mort vos respitera ,
ja mes mes cuers ne l ' amera . "
Respont Renart : " Sire Isangrin ,
or seront vostre li chemin ;
encor est Dieux la ou i siaut ,
si vos conseillera , si viaut . "
Et dist li rois : " Or tost dou pandrel
Je ne quier , certes , plus atandre . "
Ja fust panduz , que qu ' il s ' an plaigne ,
qant li rois garde en la chanpaingne
et vit une grant chevauchie
ou mainte dame avoit iriee .
Ce fu la dame dant Renart ,
qui vint poingnant tout un essart
et mout venoit hastivement ,
merveilleus duel ala menent ;
si troi fil ne s ' i atarjoient ,
avoc li grant duel demenoient :
lor point detortent et detirent ,
lor chevoux et lor dras descirent
tel noise font et tel crïee
q ' an les oïst d ' une liuee .
Ne vienent pas trop belement ,
einz chevauchent isnelement ;
un somier tout chargié d ' avoir
amainent por Renart ravoir .
Ainzçois qu ' il deïst sa confesse ,
ont il deronpuee la presse
et vindrent a si grant desroi
que cheü sont au pié le roi .
La dame s ' estoit avancie ,
qui au pié le roi est lancie :
" Sire , merci de mon seignor ,
por amor Dieu le creator !
Sire , donrai vos cest avoir ,
se de lui viaus merci avoir . "
Li rois choisi le grant tresor
par devant lui d ' argent et d ' or ;
de l ' argent fu mout couvoitous :
" Dame , fait il , foi que doi vos ,
Renart est si vers moi mesfaiz ,
tant a anuiz a trestoz faiz ,
nus ne le vos porroit retraire ,
si en doit l ' an justise faire ,
que de son mesfait ne s ' amande .
Bien a deservi c ' om le pande :
ce me dïent tuit li baron
aus forches pandent le laron ,
et por voir , se je ne lor ment ,
par ceus iert livrez a torment .
- Sire , por Dieu en qui tu croiz ,
pardonez li a ceste foiz . "
Li rois respont : " En Dieu amor ,
je li pardoin par vostre amor :
par tel couvent vos iert randuz
q ' au premier mesfait iert panduz .
- Sire , fait ele , je l ' otroi :
ja n ' en sera requis par moi . "
A tant le firent desnouer .
Li rois le fist o soi monter
et il i vint touz deslïez ,
les menuz sauz , joianz et liez .
" Renart , fait il , gardez vos mes .
De ce avez vos ore pes ,
mes quant vos remesferez primes ,
vos revanroiz a ce meïsmes .
- Sire , fait il , Diex me desfande ,
que je ne face qu ' en me pande .
" Grant joie fait a sa mainie ,
que devant lui ne rit il mie :
cestui baise , cestui anbrace ,
ne vit mes hui riens qui li place .
Qant Isangrin le vit delivre ,
il vosit mieuz morir que vivre .
Grant poor ont trestuit de lui
qu ' i ne lor face encore annui ;
si fera il , se Diex li done
que il voie vespres ou none .
Torner voloit Renart arriere ,
qant li rois garde en la charriere
et vit trestout droit une adroice
une biere chevaleresce .
Ce estoit Chauve la souriz
et Pelez li raz , ses mariz ,
que Renart avoit estranglé ,
qant de desoz lui l ' ot gité .
Et la conpaigne dame Fauve
estoit , la suer ma dame Chauve ,
et .x . que freres que serors ;
vienent au roi faire clamors ,
que filz que filles , bien .XL . ,
autres paranz plus de .LX .
De la dolor qu ' il demenoient ,
trestuit ainsi con il venoient ,
li airs dou ciel retentisoit
et tout li mondes fremissoit .
Li rois s ' estut un pou a destre
por savoir que ce pooit estre ;
entent le cri , entent la noise :
il n ' a talent que il s ' envoise .
Qant Renart voit le duel venir ,
de poor conmence a fremir :
sa fame en envoia arriere ,
tel poor a de cele biere ,
et sa mainie et ses anfanz
et il remest li sodoianz .
Tout coiement issent de l ' ost ,
a . lor chastel en vienent tost ;
Renart remest en avanture .
La biere vient grant aleüre ;
ma dame Chauve par la presse ,
ou vit le roi , a lui s ' eslaisse ,
si li crie merci en haut ;
a terre chiet , le cuer li faut ;
la mere chiet de l ' autre part .
Trestuit se plaignent de Renart
et font une noise si grant
que l ' en n ' i oïst Dieu tonant .
Et li rois vost Renart reprandre ,
mais il ne le vost mie atandre ,
einz s ' en foï , si fist que sage ,
que pres li estoit son demage .
N ' avoit que faire de son conte :
desus un grant chesne s ' en monte ;
aprés lui vont tuit arouté ,
souz le chesne sont aresté ;
le siege gurent en viron :
n ' en desçandra se par aus non .
Li rois li dit et li conmande
qu ' il vaingne a lui et si desçande .
" Sire , ce ne ferai ge mie ,
se tes barnages ne m ' afie
et vos ne me donez ostage
que je n ' i avrai nul domage ,
que je voi ci mes anemis
en viron moi , ce m ' est avis :
se il me tenoient a plain ,
douroient moi tel frapelain .
Or vos tenez la jus tuit coi ,
contez d ' Auchier et de Lanfroi ,
qui set noveles , si les cont
et je l ' orroi de ci amont . "
Li rois oï gaber Renart ,
de mautalant tressue et art ;
.II . coignies fist aporter ,
le chaine pristrent a coper .
Renart a grant poor eüe ,
qant ceste chose a queneüe ;
les barons vit iluec rangiez ,
chascuns atant qu ' il soit vangiez ;
ne set conment s ' en puisse aler .
Renart conmence a avaler
et tint en son poing une roche ;
vit Isangrin et si l ' aproche .
Oiez com il fist grant merveille :

le roi en fiert joste l ' oroille ;
por .c . mars d ' or ne se tenist
li rois qu ' a terre ne venist ;
tuit li baron i acoroient .
Endementres qu ' il entendoient ,
saut jus Renart et torne en fuie ;
et d ' autre part chascuns le huie ,
et dïent tuit si con il sont
que ja mes ne le chaceront ,
que ce n ' est pas chose resnable ,
einz est un rain de vis doiable .
Or est remés le chaceïz ,
fuiant s ' an va le plaiseïz .
Le roi enportent li baron
droit ou palois en sa maison .
Un jor se fist li rois saingnier
et vantouser et bien baignier
tant que il vint en la santé
ou il avoit devant esté ;
et Renart ensi en eschape ,
mais or gart bien chascun sa chape !